CLUB Chemvora.
Where change begins.

അഷ്ടമുടിക്കായലിന്റെ ഓളങ്ങൾ തഴുകുന്ന ചെമ്മക്കാടിന്റെ മണ്ണിൽ, എക്കാലവും നിലനിൽക്കുന്ന മതസൗഹാർദ്ദത്തെയും പരസ്പരസ്നേഹത്തെയും നെഞ്ചിലേറ്റിക്കൊണ്ടാണ് ‘ക്ലബ് ചെംവോറ’ ഇന്ന് ഔദ്യോഗികമായി നാടിനായി സമർപ്പിക്കപ്പെടുന്നത്. ഒരു വലിയ സ്വപ്നത്തിന്റെ പിന്നാലെയുള്ള ഈ യാത്ര, തലമുറകളെ തമ്മിൽ കോർത്തിണക്കാനും മറുനാടുകളിൽ കഴിയുന്ന പ്രവാസികളെ നാടിന്റെ സ്പന്ദനങ്ങളുമായി ചേർത്തുപിടിക്കാനുമുള്ള ഒരു പൊതുവേദിയായി മാറുകയാണ്.

കലാ-കായിക മേഖലകളിൽ നാടിന്റെ പ്രതിഭകളെ കണ്ടെത്തി പ്രോത്സാഹിപ്പിക്കുക, അർഹരായവർക്ക് കാരുണ്യത്തിന്റെ കൈത്താങ്ങാകുക, സ്ത്രീ ശാക്തീകരണത്തിന് പ്രാധാന്യം നൽകുക, ‘ഗ്രീൻ മിഷൻ’ വഴി പ്രകൃതിസമ്പത്ത് സംരക്ഷിക്കുക എന്നിവയ്ക്കാണ് ക്ലബ് പ്രഥമ പരിഗണന നൽകുന്നത്. വയോജനങ്ങളുടെ ക്ഷേമവും സുരക്ഷിതത്വവും ഉറപ്പുവരുത്തുന്നതിനോടൊപ്പം, വിദ്യാർത്ഥികളുടെ നൈപുണ്യ വികസനവും യുവാക്കളുടെ സർഗ്ഗാത്മക വളർച്ചയും ലക്ഷ്യമിട്ടുള്ള വിവിധ പദ്ധതികൾ നടപ്പിലാക്കുക എന്നതും ഞങ്ങളുടെ പ്രധാന ലക്ഷ്യമാണ്.

നാടിന്റെ വിശേഷങ്ങളും വർത്തമാനങ്ങളും വളർച്ചാഘട്ടങ്ങളും പ്രിയപ്പെട്ടവരിലേക്ക് എത്തിക്കുന്ന ഈ എളിയ ബുള്ളറ്റിന് തുടക്കം കുറിക്കാൻ സാധിച്ചതിൽ ഞങ്ങൾക്ക് ഏറെ അഭിമാനമുണ്ട്. എല്ലാവരുടെയും പിന്തുണയും ഒത്തൊരുമയും മുൻനിർത്തി, ചെമ്മക്കാടിന്റെ തിളക്കമാർന്ന നാളേക്കായി നമുക്ക് ഒന്നിച്ചു കൈകോർക്കാം.